與林作冷戰 麥明詩暗示有偈傾

「十優港姐」麥明詩（Louisa）因男友林作夜蒲銅鑼灣，搞到嬲嬲豬。雖然男友指純屬誤會，然而Louisa日前與男友吃飯時突然情緒變得激動，更當眾喊起來，兩人關係看似無彎轉，不過昨日Louisa強調與林作仍有偈傾。

昨日麥明詩和拍檔何浩文（Dominic）一同出席劇集《賭城群英會》宣傳，有報道指Dominic日前在網上自彈自唱《怎麼說不愛你》和《反擊的愛人》，疑似唱給麥明詩聽。Louisa表示：「謝謝大家關心，大家都是朋友，也是我第一次拍戲的對手，佢教識我好多嘢。」

Louisa承認男友被拍到攬女，心裏確是有點不舒服，她說：「一段關係入面，你哋睇到嘅嘢係問題嘅病徵，但我唔會將呢件事放大，我哋兩個都有問題，會自我檢討，呢段時間都有聯絡、溝通和見面。」被影到在公眾場所喊，Louisa坦言總好過放在心，問她會否原諒男友？她說可以試下，但不會勉強。她稍後赴巴西做奧運外景時會好好冷靜一下，但相信這幾年都不會去諗結婚。

再問到Louisa點睇何浩文？她說：「佢做戲認真、專業同埋肯帶新人，拍戲期間經常帶來輕鬆氣氛，好積極搞gag。」要是對方展開追求攻勢又會揀誰？Louisa笑謂：「如果我係單身，唔會得兩個選擇，會有第三條路綫，世界有咁大個森林！」