子華戲言前世欠咗安仔

正籌備廣東碟的許志安，早前為新歌《芝士》拍MV，邀得「男神」黃子華客串扮保安員，他更「實Q」上身扮認錯鄭秀文，竟爆肚稱：「鄭秀文係唱大戲㗎！」

許志安表示新歌其中一句歌詞寫到「笑匠失蹤」，於是MV導演兼樂隊RubberBand主音6號問安仔，可否搵到子華拍MV？結果一拍即合。子華解釋：「我唔係第一次幫安仔，我呢世人未試過做演唱會嘉賓，都幫佢（安仔）做嘉賓，又客串埋MV，但我要鄭重聲明，我（通常）係唔客串，唔好搵我客串，但偏偏又幫佢，點解呢？我一定係前世欠咗佢，借咗五両銀冇還到，今世要返嚟還，無可奈何到極。」

雲吞麵做報酬

安仔笑言為了報答黃子華客串之恩，一定要請他食餐好，子華回應：「即係起碼有碗雲吞麵啦！」有人問安仔會否結婚擺酒請子華去飲？安仔馬上語塞，子華乘勢幫老友解圍：「你結咗婚咩？吓？佢唔答喎。」

撰文：Pauline

編輯：陳禮恒

設計：梁政敏