大肚陳敏之犯禁忌偷食

陳敏之、森美及樂瞳等昨日出席《Sundy好戲王》慰勞宴。目前腹大便便的敏之揚言產後想添食與森美再合作主持節目，森美則潑冷水說：「我驚到時佢忍唔住想追生，好事成雙嘛！」

《Sunday好戲王》前晚拍完最後一集，森美笑言拍攝時被安德尊及陳嘉佳（細細粒）聯手整蠱：「我最後畀大王塞我食Wasabi，又要我揹起細細粒。」談到敏之希望產後節目再添食，森美笑言等她生B後再傾，又笑稱正游說敏之再追B，盼見證敏之由靚女變師奶，他笑言：「我說服緊佢，講佢知生第二個B嘅好處。不過通常靚女都會被個仔治到佢，好似我老婆鬧仔時前所未有咁惡。」

自爆上圍明顯升Cup

敏之就表示拍完最後一集就會專心陀B，現時已不停進補，希望BB出世後皮膚會又白又滑。早前有報道指她懷孕期間犯足所有大肚婆禁忌，又偷偷飲酒，她不諱言曾試過偷食薯片和飲凍檸茶：「好似毒癮一樣，食嘅時候真係開心到反白眼㗎！」她又表示，自從懷孕後，上圍明顯升Cup，笑稱終於出現前所未有的事業綫：「我有揸過自己個胸，真係好揸手喎，連老公都開心咗，哈哈！」

撰文：Pauline

編輯：林梓添

設計：梁政敏