《學是學非》是非精齊玩「比卡超」 張秀文出海捉精靈

呢期最Hit，必屬《Pokémon GO》！不但令市民進入瘋狂狀態，為野生捕獲小精靈，天時暑熱都要落街行，成為難得一見的奇景。不少藝人沉迷其中，《學是學非》「是非精」張秀文、黃心穎及麥美恩更與大家分享捕捉心得，齊齊Gotcha！

在是非精中，以新一代咪神張秀文最沉迷，遊戲上架當日已捕獲過百隻小精靈。「之前聽到有試驗版已經即時download，但捉咗比卡超就鎖區，餓咗好耐！」秀文提議步行或搭車塞車時，要第一時間開Game捉寵，「我會搭渡海小輪過海，因為近海地方多啲海系精靈，好似鯉魚王！我喺將軍澳，捉來捉去都係類似品種，最多係波音蝠。」

趁搭叮叮孵蛋

不少人身在家中捉寵，但有時GPS定位接收不良，或長期處於同一位置。秀文笑說：「我會先登出，再登入帳戶，趁定位再detect時，有機會定咗去唔同位置，乘機捉唔同嘢。」

至於孵蛋，秀文表示要搭住叮叮孵，「行路、跑步都會計落孵蛋所需嘅哩數，但好似話時速超過30公里就唔計，所以搭叮叮孵最好。」

黃心穎 捉寵Gathering

心穎BB首日試玩，已經在時裝店、髮型屋野生捕獲小精靈。「我畀錢買嘢嗰陣見到有小精靈，忍唔住叫收銀等我一陣，捉埋隻小精靈先！」她選擇以守株待兔方式，安坐家中，電話長期叉電方便捉寵。「依家一班朋友約食飯聚會，會特登揀啲偏遠地區，方便捉啲少見嘅精靈！」提到「是非精」組成黃隊戰鬥，心穎BB反其道而行，揀了藍色隊應戰。

麥美恩 靠陌生人幫助

從加拿大回流的麥美恩，笑言港人為打機一反常態。「我成日覺得香港人步伐好快，呢幾日竟然變得好慢。我試過喺街拋咗好多精靈球都捉唔到，竟然有陌生人搭訕，教我點捉，覺得好守望相助。」她笑言捉寵之餘，記得留意路面情況，以免影響別人。「我成日舉起電話去捉，驚人哋誤會我偷拍，所以記得顧及途人感受。」

撰文：李潔盈

編輯：林梓添

設計：Simon