秋生嚴禁同毛姐有火花

將於4月4日首播的處境劇《愛．回家之八時入席》，除有黎耀祥、毛舜筠（毛姐）孭飛外，還會不定期加入重量級藝人客串，打頭陣有視帝黃秋生。昨日秋生入電視城拍攝，跟毛毛甫見面即雞啄唔斷。

黃秋生與毛舜筠昨日在電視城為《八時入席》開工，兩人除了對手戲，還與一班年輕演員合作，秋生更點名稱讚劇中飾演他助手的賴慰玲有潛質，令對方既驚且喜。

秋生繼《梟雄》後再度為無綫拍劇，今次答應客串《八時入席》，他不諱言全因毛姐才返TVB。問二人合作可有火花？他即笑謂：「我哋講工業安全，唔准有火花。其實我都好想似毛毛去讀藍帶學廚藝，我直頭想轉行，之前睇咗張相，毛毛好厲害，有背肌，不愧為我偶像。」

拍劇見好就收

毛姐亦指秋生最愛逗她開心，她承認與秋生拍劇才懂得笑，因他經常講說話和做一些小動作引她笑，她還說：「秋生帶挈我有好嘢食，有紅酒飲，希望佢再返嚟拍，邵小姐（監製邵麗瓊）話已經寫咗佢再返嚟演出嘅劇情。」秋生聞得監製來一招先斬後奏，即裝作驚訝表示：「嘩，依家啲女人幾得人驚！我覺得夠喇，應該到此為止。」再問秋生會否得閒就回來拍劇？他打趣謂：「好難話得閒兩日就拍兩日，其實我之前得閒咗兩年呀。」

撰文：Pauline

編輯：陳禮恒

設計：鄧俊明