陳豪狂減肥做時尚教父

叫得做「潮流教主」，自然着慣靚衫、品味獨到，受盡一眾時裝精景仰。然而，教主雖然表面風光，實質飽受工作、輿論壓力，少一點霸氣也不行。新劇《潮流教主》找來陳豪演繹男版「穿Prada的惡魔」，他為此瘋狂減肥，務求以最型姿態示人。

陳豪的好男人形象深入民心，為將奄尖刻薄的時尚雜誌總編演得更傳神，單在外形已下了不少苦功。監製方駿釗笑說：「阿Mo主動提議將兩側嘅頭髮漂成白色，拍攝期間仲不停漂染，好傷頭髮。本來佢有個小肚腩，我想佢着衫靚啲，開拍前要求佢減肥，佢真係用咗半個月時間狂減，結果瘦咗成個碼入劇組。」劇中陳豪腹背受敵，幾乎所有同事想將他拉下馬，只得徒弟蔡思貝真心待他。不過，蔡思貝常被彈演技浮誇，方駿釗則為她平反。「今次佢演繹方法同以前好唔同，細緻舒服好多。」

李佳芯有氣質

他亦大讚備受力捧的李佳芯，「佳芯內心戲表現好好，加上佢好有氣質，即使做壞事，都唔會討厭佢，反而同情佢。」

撰文：李潔盈

編輯：林梓添

設計：nc