日系班戟甜品專門店

主題甜品店愈開愈多，各有捧場客，最新登場是日系班戟店PAN de PAIN。班戟鹹甜凍熱傳統創新兼而有之，超靚的賣相，po相呃like好容易！

一室淺木色調，配襯黃與白色磚牆，綴以吊燈和綠色盆栽，簡潔和洋風格調；設有開放式廚房，可看到廚師打忌廉、砌甜品，似足東京的甜品cafe。以為是日本品牌，其實老闆和大廚都是香港人。因為愛日系甜品，半年前飛到東京、大阪和京都觀摩，看見當地的班戟專門店大受歡迎，就敲定以班戟做主題。

和風配方

班戟由女廚Muse主理，為做出日系神髓，班戟配方自家鑽研，以日本麵粉、北海道3.6牛乳和雞蛋炮製，造出綿密質感，富麵粉香和蛋香。配料也落本，法國牛油、加拿大楓糖、Movenpick雪糕，大部分水果都用日本和韓國貨，統統都為味道加分。班戟配搭有鹹有甜，有熱有凍，有最傳統的牛油楓糖味，亦有當地大熱的水果系列，有的結合法日style。必試Strawberry pancake，及因應香港人喜好而設計的Tiramisu、Creme brulee和Souffle班戟。凍食、熱食和souffle班戟口感味道都不一樣，足見誠意。

飲品有別於一般cafe，必飲自家製detox water，以過濾水加新鮮水果浸12小時，淡淡的滲出果味，清爽有益；啡迷除了選冰滴，可試沖繩珊瑚咖啡，咖啡豆加入乾珊瑚烘焙，帶陣陣礦物和海洋氣息。

PAN de PAIN Pancake & Sweets

地址：尖沙咀河內道18號K11 B1層11B

電話：2576 1968

平均消費：$100

編輯：魏雋

設計：鄧俊明