傅穎默認戀上內地男

久未在港露面的傅穎（Theresa），近年工作已向北移，不過香港樂迷對她印象最深刻的，始終是她與羅仲謙的一段情；目前男的名草有主，更盛傳與楊怡開花結果，原來傅穎亦悄悄地展開了新戀情。

傅穎昨日出席商場舉行的旗袍活動，她表示讀書時的校服裙是旗袍款，所以早已習慣穿着，入行後亦拍民初劇也有機會穿旗袍，她笑言：「對旗袍又愛又恨，因為要保持纖瘦身形才着得好睇，而且旗袍也容易凸顯女性魅力。」

穿上斗篷露腰裙出席活動的Theresa，紅粉緋緋的她談近況時，透露剛由北京返港，並於早前簽約一間內地的新經理人公司，未來會繼續專注內地發展，希望參與更多影視工作，而音樂方面仍由自己製作，她表示：「去年比較懶，好多工作都拖延到2016年，好似出書、出人形公仔、錄歌等，我答應fans希望今年內可以實踐承諾。」

今年再出散文集

多年前Theresa已推出漫畫散文集，直到近兩年突然停下來，為此她希望今年暑假可以再推出散文集，以往她設計了一個figure娃娃，今次會為公仔設計一個男朋友仔，問她可有為自己搵個男朋友？Theresa即露出甜絲絲笑容，並點頭示意，她笑說：「OK啦，咁大個人拍拖都正常。（佢係圈內抑或圈外人？係內地人？）細節唔講啦，大家問咗咁多年，咁關心我感情事，次次都答你哋仲係單身，呢個年紀拍住先啦。（會閃婚嗎？）唔會，暫時未有結婚計劃，結婚一定會同大家講。」

當記者再追問感情事，Theresa即笑說：「唔好問啦，再問我就會講晒出嚟㗎啦。（依家係咩階段？）OK，開心囉。」新春期間會否到男友家拜年，她表示還未知道，不過情人節會在工作中度過。

採訪：Pauline

攝影：林良明

編輯：黃寶恩

設計：梁政敏