單身小儀 否認患抑鬱

小儀與金剛最近可謂同病相憐，金剛被指與女友陳蕊蕊感情亮起紅燈，輪到小儀更因為五年冇拍拖，而被雜誌稱她患上抑鬱症，難得小儀一向玩得，笑言身體不適故不想受訪，甚至自爆想同金剛「翻撻」。

金剛、小儀、曾志偉及高海寧等前晚錄影節目《Sunday好戲王》，小儀與金剛影合照時毫不尷尬，拍檔陳智燊更在旁起哄：「咀佢。」務求令二人感情升溫。

小儀聽到緋聞面色一變，即以生病為由拒絕受訪，還笑言：「我係同金剛『翻撻』，我唔係抑鬱，係躁狂呀！」金剛卻在旁嬉笑說：「佢對我不嬲有感覺，不過依家我唔係單身嘛。（有報道指你甩拖？）冇可能。其實我同小儀都係舊聞啦，又翻炒？聽到都好笑。（如冇女友會否考慮小儀？）雖然我個人好，但唔夠佛心，我同佢心靈上係好朋友，但身體方面做唔到好朋友囉。小儀係我嘅凍齡女神，唔敢高攀！」他又說女友陳蕊蕊明白只是炒作，並沒介意，又強調與小儀都不是彼此喜歡的類型。

問會否介紹男仔給小儀？他忍不住踢爆：「佢鍾意靚仔，若你係彭于晏，你會唔會揀佢？」他相信小儀不會因緋聞發爛渣。

志偉舒淇結片緣

同場的曾志偉剛由台灣返港，他透露最近在拍2017年賀歲片《健忘村》，與舒淇、張孝全合演。志偉笑言近半年經常飛，甚少留在家中，交租只為了畀菲傭住。問他拍真人騷會否擔心受傷？志偉直言拍真人騷很辛苦，曾與女兒曾寶儀參加《極速前進》時痛風發作，故日後會了解清楚才接拍。

撰文：Pauline

編輯：陳禮恒

設計：梁政敏