張衞健結婚 造就許生許太復合

張衞健（Dicky）前晚擔任鄭秀文個唱嘉賓，兩人曾在2000年的TVB台慶劇《齊天大聖孫悟空》合作過，當時Dicky扮孫悟空，Sammi演觀音，她表示當時未信耶穌才可以扮演觀音。Dicky繼續玩踢爆：「當時老闆仲話：『你係唔係真？搵到鄭秀文嚟拍？我畀多500萬！』結果佢嚟足三日，我就乜都唔使做，只係日日對佢講『多謝』，斗零（錢）都唔使分畀佢，而我就袋袋平安，家陣我住緊層樓你都有份畀。大家睇到，我係一個飲水思源嘅人！」

Dicky停唔到口，更得戚地說：「今時今日許生許太有咁美滿嘅生活，我居功至偉呀！小弟同老婆喺菲律賓搞咗一場三日兩夜婚禮，當時我哋分別邀請咗，當時仲係處於分手狀態嘅許志安同梁漢文……」此時，Sammi已經笑到講唔到說話，Dicky補充說：「我要澄清，許志安同梁漢文無嘢㗎，鄭秀文唔係煙幕！我有理由相信佢哋就喺呢三日兩夜，成功翻撻！」不過，Sammi立即否認此說。