「明蝠俠」做嘉賓 Sammi嚇到爆裙

鄭秀文（Sammi）前晚在紅館舉行第五場《Touch Mi 2鄭秀文世界巡迴演唱會2016》，她特意挑選一條靚裙配襯特別嘉賓「明蝠俠」黎明，點知他未出場，Sammi唱到中途突然爆裙，嚇得她尖叫嗌救命。

休場一天後，前晚Sammi狀態大勇，甫開場又唱又跳《Fabulous》和《螢光粉紅》後，她深情地說：「今次《Touch Mi part2》對我係一個好特別嘅歷程，未試過開騷出現咁嘅狀況，好彩我個人好positive，整件事上無孤單感覺，每晚上到台就有萬幾個天使support我！」

當Sammi唱《我們的主題曲》時，換了新裙風騷地繞台走一轉，怎料裙子背後突然爆裂，她立即反手捉住條裙，並尖叫求救：「條裙拉鏈爆咗呀，救命呀，好驚呀，我咁瘦點解會爆？」工作人員立即衝上台替她穿上運動外套。此時特別嘉賓黎明（Leon）出場，他替Sammi檢查有否走光，之後拖實她派定心丸。風騷的Sammi更興奮表示，大叫一下連把聲都開埋。

林日曦被拉上台

Sammi稱呼黎明做「明蝠俠」，又笑言大家都在演唱會頭場發生過意外，她說：「你失篷、我失聲，但我哋處理危機方法都唔錯呀！」之後他們拉埋觀眾席上的「腦細」林日曦上台，林日曦自爆十日前Leon搵他一齊做嘉賓，他大讚Sammi抱恙仍堅持演出。Leon又拋金句，他說：「做嘢想做到100分，但通常做到100分嘅時候就有突發事情發生，包括失聲。」三人台上selfie後，Leon唱新歌《我唔係死蠢》，林日曦更全程網上直播。

撰文：Pauline

編輯：黃寶恩

設計：梁政敏