新戲重演雷洛探長 華仔否認再做老竇

劉德華前日剛度過55歲生日，一向有女萬事足的他，近日盛傳老婆朱麗倩秘密到外地產子，添丁成功。華仔昨日趁新戲開鏡禮，澄清家中未有增添新成員。

劉德華、甄子丹、鄭則士、秦煌及劉浩龍等，昨天在屯門參與新片《追龍》開鏡儀式。華仔再次以五億探長雷洛造型現身，記者笑他恍如年齡逆轉，他說：「因為角色係雷洛剛升華探長嘅時期，我都50幾啦！」

華仔表示前日跟家人和朋友出街食飯慶祝生日，問他的小情人女兒劉向蕙（Hanna）送甚麼禮物？華仔故作嬲怒表示：「冇呀！舊年都有嚿泥膠，今年淨係唱咗生日歌。」華仔又自爆朋友送上十個八個「K歌神器」給他，記者笑言一家人可在屋企大合唱，華仔即笑說：「我屋企冇八、九個人喎。（係咪最近多咗家庭成員？）冇喎，我好清楚話畀大家聽：冇，久不久就會傳。（報道話你因為個女成日畀人追訪，所以唔想個仔曝光？）唔會、唔會。其實大家好畀面我，我喺屋企過得好舒服。」

子丹演跛豪唔夠打

王晶踢爆他跟子丹片酬高，華仔續稱：「不嬲都幾高，但冇人哋咁高囉！（傳子丹片酬達3,000萬人仔？）應該嘅，老闆會衡量，我同當年做雷洛時嘅身價都唔同。」至於子丹為了演跛豪，學了潮州話幾個月。呂良偉曾演跛豪，子丹有向他取經，但他否認片酬達3,000萬元，子丹稱：「講錢冇意思，我能夠同劉生合作好榮幸。（你同華仔邊個好打啲？）梗係Lok哥（雷洛）贏晒啦！（你係宇宙最強喎！）唔好誤解宇宙最強，乜都要試下。（晶哥話你哋片酬好貴。）劉生貴啲！佢不嬲貴過我，我片酬唔多。」

採訪：Pauline

攝影：林良明

編輯：陳禮恒

設計：梁政敏