陳法蓉寸爆回應選美黑幕

陳法蓉（Monica）早前在西藏開工時遇上高山症，危急至要立刻停工，前晚她出席慈善籌款活動開幕禮，身體狀況已明顯好多了。對於近日同屆港姐梁佩瑚大爆當年她參選時違規，她亦主動回應。

前晚陳法蓉精神奕奕現身活動，不過提起西藏之行仍猶有餘悸：「我以為自己身體好好，點知反覆出現高山症，有時唞氣又唔暢順，有時就要去高壓氧氣箱，之後再去西藏拍劇時心理壓力都好大，好驚死喺山上面。」工作完成後，Monica返港同時接受中西醫調理，仍在康復中。

提到同屆港姐季軍梁佩瑚大爆Monica選美時曾私下影雜誌封面，Monica指報道出街時身在西藏，兩星期前對方透過一位前輩向她轉發道歉信息，事情已告一段落。至於，朱潔儀說Monica選美時食煙被保母發現，有人為求自保不惜轉嫁到其他佳麗身上。Monica稱：「有睇報道，但九成以上都係無名無姓，我覺得冇根據，冇必要為無中生有嘅嘢作回應，我唔會係將支煙畀人哋嗰個，你哋應該問番佢，唔係人哋講就係真。」

撰文：Pauline

編輯：林梓添

設計：梁政敏